Monday, October 20, 2008

تورتيليني على طريقتي

مين مبيحبش الباستا؟ أنا شخصيا معرفش حد مبيحبهاش. المره دي أنا مطبختش باستا أنا عملتها. التورتيليني أكله لزيزه جدا. أنا من عاشقيها لكن لما بروح السوبرماركت مبلاقيش غير باكيت تورتيليني مستوردة محشية جبنة أو مشروم. بصراحه جربت معظم الأنواع وحتى في أكتر من مطعم إيطالي بس معجبتنيش. فقررت أتعلمها وأعملها في البيت. واحشيها على مزاجي.

إلي منكم ميعرفش التورتيليني هي باستا أو مكرونة محشية وفي الوصفه دي أنا حشيتها لحمة مفرومة من غير صلصة. الوصفة دي مختلفة عن أي وصفة تورتيليني تانية محشية جبنة ومعموله في وايت صوص ومشروم مثلا. انا عملتها باللحمة المفرومة وحطيت طماطم مشوية بزيت الزيتون قبل ماقول أنا إزاي عملت الطبق دا هشرحلكم بسرعة إزاي حضرت عجينية التورتيليني
المكونات
5 بيضات
3كاسات ونصف دقيق قمح ابيض
طريقة التحضير
حطي الدقيق على سطح املس(الكاونتر) تقدري تعجني عليه. اعملي حفرة في نص الدقيق وافتحي فيها البيض وابدئي حركي بالشوكة في البيض تدريجيا لحد مالعجين والبيض يبدأو يخلطو على بعض.

سيبي الشوكة وابدأي اخلطي بإيديكي لحد مايبقي عندك كتلة متماسكة من العجين غطيها بورق وسيبيها في المطبخ مابين ساعه لتلات ساعات

في الوقت دا ابدئي حضري الحشوة الي هتحشي بيها التورتيليني. انا حشيتها لحمة مفرومة عصجتها عادي بالبصل من غير صلصة
الحشو
1\3 كيلو لحمة مفرومة
بصلة متوسطة مفرومة فرم ناعم
ملح وفلفل اسود
ملعقة متوسطة زبدة او زيت حسب الرغبة
التحضير
في طاسه سميكة حطي معلقة الزبدة اول ماتيسح وتبدا تسخن حطي البصلة قليبيها عالنار لحد مالونها يبقى ذهبي. اضيفي اللحمه المفرومة قلبيها على النار وبعدين وطي النار وسيبيها تستوي ولما تخلص خالص اضيفي ملح وفلفل حسب الرغبة.علشان اللحمة تكون مناسبة للحشوه اتأكدي انها شربت ميتها كلها وبقت نوعا ما ناشفة
بعد ماللحمة تستوي سيبيها تبرد. وفي الوقت ابدأي حضري الصوص بتاع التورتيليني.
الصوص
3 حبات طماطم
زيت زيتون
رشة زعتر جبلي او بردقوش
ملح
التحضير
قطعي الطماطم ورشي عليها زيت زيتون وملح والزعتر ودخليها الفرن تتشوي
في الوقت دا طلعي العجينة بتاعة التورتيليني وافريديها لحد ماتبقي رفيعة وابدئي اقطعي دوائر فيها بالقطّاعة وهكذا لحد متخلصي العجينة

افردي الدوائر دي على الكاونتر وبمعلقة صغيرة حطي في نص الدائرة بالظبط لحمة مفرومة. طبقيها من النص بحيث تبقى نص دائرة واضغطي على الاطراف بصوابعك ممكن تستعملي البيض المخفوق علي الأطراف عشان تكون ثابتة أكتر

. بعد ما تثنيها لفيها زي التاج.

التقديم
اغلي قدر ماء على النار وزي اي باستا اخرى اسلقي التورتيليني لحد ما يستوي و بعدين صفيه وحطيه في طبق. حطي عليه الطماطم وزينيه بالجبنة البرميجان المبشورة


تقدم ساخنة وحدها او مع خبر الثوم المحمص

Sunday, October 19, 2008

سلطة التفاح



السلطة دي أنا بعتبرها وجبة غذائية كاملة. فيها تقريبا كل العناصر الغذائية باكلها كوجبة عشاء لإنها بتخليني احس إني شبعانة وفي نفس الوقت متعت حواسي بطعم مش تقليدي لسلطة مش عادية.
المكونات:

الخضروات:

خس - طماطم - خيار - ملفوف أحمر - فلفل حلو أو أي من خضرواتكم المفضلة

التتبيلة:
ملعقة مسطردة كبيره
بصل أخضر
ملح وفلفل اسود
1\2 فص ثوم
خل أبيض

التزيين:
حبات جوز (عين جمل) محمصةو مملحة
جبنه شدر صفرا مقطعة شرائح أو مبشورة

الطريقة:
افرمي البصل الأخضر. اطحني الثوم وحطيه مع البصل وعليهم المسطردة والخل. أضيفي الملح والفلفل الأسود حسب الرغبة قلبي الخليط كويس وسيبيه من ساعة لتلات ساعت في الثلاجة
اغسلي الخضروات جيّدا وقطعيها قطع كبيره أو متوسطة زي ما تحبي. اخلطيها كلها مع بعض في طبق التقديم
اضيفي التتبيلة قبل التقديم مباشرة ثم زينيها بالجبن والجوز.

سلطة على الطريقة التايلاندية


السلطة دي بتعتبر وجبة كاملة ممكن تحضريها وتاخديها معاكي الشغل تاكليها كوجبة غذاء ميزيتها انها غنية وسهلة التحضير.

المكونات:
1كوب من مركز حليب جوزالهند
1ملعقة طعام من صوص المحار
400 جرام من صدور الدجاج المخلية مقطعة مكعبات
4 حبات خيار
2فلفل حلو أحمر
بصلة صغيره يفضل بصل أحمر
1 حبة فلفل أخضر حار
كبشة فول سوداني محمص ومملح
الطريقة:
سخّني مقلاة عميقة, اضيفي صدور الدجاج وقلبيها لحد ماتستوي وتشرب ميتها ولونها يكون ذهبي بعد كدا اضيفي حليب جوز الهند وصوص المحار و حركي المزيج لحد ما يغلي.
اغسلي الخيار كويس وبعدين اقطعي كل خياره نصفين بالعرض وقطعي كل نصف إلى شرائح رفيعة بدون تقشير.
اغسلي الفلفل الحاركويس اوي يستحسن تستخدمي قفازين(جوانتي) عشان متحسيش بحرقان في ايديكي و فرغي الفلفله من البذور و قطعيها الي شرائح رفيعة جداً
قشري البصله واغسليها بماء بارد بعدين قطعيها الى شرائح رفيعه برضو ونفس الكلام للفلفل الأحمر البارد.
اخلطي الخضروات المقطعة كلها سوا وبعدين صبي عليها مزيج الدجاج وزينيها بالفول السوداني المحمص وبالهناء والشفاء.